濕疹玩死我

濕疹新聞，全城討論

2011-11-15T11:34:00.005+08:00

今日上網睇報紙睇到一單濕疹新聞，全城討論。

事源是一個濕疹中醫生將類固醇混入中藥藥膏。
聽到呢單新聞我都唔覺得奇怪，因為早前都有網友

同我講過呢位醫生無端端沒有藥膏的事。　
有些＜親子王國＞的網友更發起一起夾錢驗藥的ＰＯＳＴ。

身為一個中醫師，如在知情的情況下，胡亂使用西藥去招搖撞騙。

點講也是講不過去。將一支幾十元的類固醇，卻扮作幾百元的藥

膏去賣，真是十分＂不該＂。

父母痛心年幼子女的病況。即使我不是父母，我也明白到

我的父母有多擔心。所謂醫者父母心。希望每個中西醫也

能對自己所做的事負責。

更值得我們去思考的是，西藥中用或者是中藥西用可能真的

能夠發揮其最大效能。另外，之前我亦有提過中藥如甘草也

有類固醇成份。我真的希望有人能夠發展出一種能使濕疹

治根的藥。大家免再受苦。

★共勵之★

<濕疹新知>韓國泡菜乳酸菌抑制濕疹(文章來自蘋果日報)

2010-04-23T13:33:00.006+08:00

【本報訊】惹味的韓國泡菜（圖）原來有助治療兒童濕疹。韓國嶺南大學的臨床研究證實，泡菜含的乳酸菌能抑制異位性皮膚炎， 100名 2至 10歲的兒童服用該菌製劑後，病情明顯較沒有服食的孩子理想。
期望研製治濕疹藥
韓國嶺南大學產學聯合研究組的研究人員指，泡菜含有乳酸菌「 Lactobacillus sakei probio 65」可抑制濕疹，研究讓 100名 2至 10歲兒童服食該乳酸菌製劑，為期三個月，發現服食的病童較沒有進食的兒童，病情好轉最多達 238%。研究刊於美國醫學期刊《過敏、哮喘和免疫學年報》，專家期望未來能研製出治療濕疹的藥物。

中文大學兒科學系教授韓錦倫表示，近年歐洲開始研究以「菌」治療濕疹，其中以乳酸菌最多人採用。韓國發現泡菜內的乳酸菌只是不同品種。部份歐洲研究已證實該菌能令過敏的高危兒童預防發病，「研究員搵啲父母都有過敏嘅高危細路，睇吓佢哋食咗之後會唔會少啲發病，結果睇發病率係低咗啲」。至於進食泡菜能否具同樣治療濕疹的效果，韓錦倫認為「如果泡菜有乳酸菌，理論上食泡菜都會有效」，但須了解研究給予兒童進食的製劑，其乳酸菌含量有多少。他強調，濕疹與遺傳及環境有關，乳酸菌對本港兒童的療效必須進行大型研究才可確定。

joeyad 個人意見: 乳酸菌對醫濕疹有幫助我都有聽過, 之前有個網友專登去台灣買, 不過泡菜係辛辣的食物, 以前我食親好辣的食物皮膚反而會痕. 食泡菜係咪真係得? 我很保留.

<網友交流>好耐都無update個blog

2010-03-02T13:09:00.012+08:00

大家好, 唔經唔覺我無update個blog差不多一年, 我想先向大家講講我的濕疹皮膚的情況. 過去一年, 我的濕疹皮膚差不多沒有嚴重的番發. 先感謝上天. 雖然,沒有嚴重的番發, 少許的脫皮及少許的乾燥總會有. 但總結來說, 我的皮膚情況很穩定. 我的朋友有時會打趣地跟我說: [ 我的皮膚比普通人還好]. 我也非常同意. 記得有一晚跟幾個朋友喝酒及食海鮮, 其實我很少喝酒, 因為喝酒對我的皮膚有很大的影響. 誰知, 喝完酒(一個喝了半打啤酒, 算多嗎?) 後的第二個清晨, 我感覺到我的皮膚有點熱, 這時我知道, 濕疹皮膚又想作怪.

這天勾起我不少患病時的回憶. 頸後的傷痕, 燙燙的皮膚... 我真的很怕. 很怕. 幸好, 請假了一天休息一下, 竟然完全沒事. 濕疹這個病真係有點難測. 我以為今次濕疹會番發. 好在無事. thks god.

患濕疹咁多年, 心理壓力真係好大. 社交的生活受到很大的影響. 患病時我曾經以為自己患上抑鬰症. 我唔知道濕疹會否永遠遠離我, 但現在我珍惜生命中的每分每刻. 患濕疹的網友. 別放棄. 我有次在飛機上聽到一個音樂節目, 主持人一句"Live in the moment". 很多事情都不是我們掌握之內, 幾時會碰到一個能醫好自己的醫生, 找到一個能醫好自己的方法. 也不是我們決定.
我們只能活在當下, 珍惜現在. 只要對生命抱有希望, 就有希望. 共勵之.

我會定期update呢個 blog. by the way我轉了一份新工作, 不會長留香港. (我的澳洲working holiday已完成, 有機會upload 多 d 相給大家看. ^^ haha!)
希望大家繼續在這個blog留留言, 以示支持.

(濕疹vs中醫) 濕疹治療新法

2009-03-17T11:39:00.015+08:00

真係好耐無寫BLOG 啦. 濕疹的病友你地最近點呀? 我之前同大家講過我要完成麥理浩徑. 我而家完成左第2,3,4,5(第5段差少少),6段啦. 而家個肚腩都細左唔小 . D 皮膚都黑左唔少. 我打算POST D 行山相俾你地睇. POST 住幾張先. 有機會POST哂俾大家睇.

最近check email 見到有幾封網友send 來的email. 真係唔好意思. 我未得閒回覆呀. 因為工作真係好忙. 之前網友Kuen提供左一段無線晚間新聞有關濕疹的報導給我. 我而家先將條link給大家. 今日放假. 等我睇下下晝做哂手頭上的工作未. 如果做得哂的話, 我就將段片分割同upload上我個blog.

(感謝網友Kuen)^^!

23-02-2009 晚間尾2果段

http://mytv.tvb.com/news/newsroundup/14948

我係用庶糖沖涼ga! 止到痕ga, 皮膚無咁乾! (把2片庶糖放入滾水煲滾5至10分鐘, 熄火後, 等到水溫到40至50度左右, 再用來淋身. 唔洗過水ga.)

大家唔好嫌麻煩. 要醫好濕疹真係要做好多工夫.

3月17日我的皮膚報告

<濕疹 VS 中醫> 紫雲膏

2009-02-03T22:29:00.013+08:00

(4/2 update): 今日風和日麗. 心情特別開朗. 我最近有個短期目標, 就係去New Zealand之前行完麥理浩徑.

上次寫Blog 已經係半個月之前的事. 其實一直都想講下紫雲膏. 我用的第一盒的紫雲膏係網友做俾我的(送的). 不過都係好耐之前的事. 果陣時我都好番好多. 不過我好怕濕疹番發. 所以我一直都有繼續收集不同治療濕疹的方法. 我真係好感謝呢位網友. 不過因為太耐la. 我連佢的網名都唔記得左. 佢仲教左我點樣整. 不過我一次都無整過呀! 因為整紫雲膏又要買呢樣買果樣. 又要煮, 對於一個只會煎雞蛋, 煮公仔麵, 又怕麻煩的我, 最後都無整到. >p< (以下係一些有關紫雲膏的網頁, 我唔想未得到網主的同意將佢copy & paste. 大家不妨click以下的link. 看看吧!)

http://cklife_soap.mysinablog.com/index.php?op=ViewArticle&articleId=268612

不得不提, 紫雲膏唔係人人啱用. 紫雲膏主要取材為紫草、當歸、冰片及胡麻油等；但御方會再加上青黛、金銀花及天然黃蜂蠟等多種治療皮膚病藥物。但孕婦、G6PD缺乏症、溶血性疾病忌用。(資料來源: 星島日報)

http://hk.news.yahoo.com/article/081217/3/9snj.html

以下的圖片是網友送給我的紫雲膏. 我用了半盒到就無繼續用. 因為我覺得d味唔係幾好嗅. 而且對我來說唔係幾止到痕. 但無論如何我真的很多謝佢的無私幫助.

紫草根 2兩 (紫草根又叫紅條紫草根/紫草茸)
當歸(歸頭) 2兩
冰片 4錢 (梅片)
麻油 660g (冷壓黑芝麻油)
橄欖油 60g
蜜臘 125g

http://www.baby-kingdom.com/?uid-86290-action-viewspace-itemid-4287

台灣有關紫雲膏的短片. 資料來源: urkuso2

大家試用時, 記得留意身體的狀況. 如有網友用過紫雲膏, 請給一些意見及用後感. 謝謝!

<網友交流>我的皮膚現況 14/01/2009

2009-01-16T09:19:00.012+08:00

之前同大家講過, 我會將我的皮膚情況每月向大家報告一下. 今日終於找到時間啦! 今個月雖然天氣乾燥, 而且時冷時熱. 我的皮膚狀態依然保持得很好. 只是頭頂的皮膚有少少痕. 患濕疹的病友可能和我一樣. 有毛髮下的皮膚會特別痕痒. 例如, 頭髮下的皮膚. 眼眉下的皮膚等等...

今個月每天的早上, 我都會到康文署的健身室跑步. 康文署的健身室開早上七點. 跑完步開工就啱啱好. (最凍果幾日都無偷懶, 早上跑唔到就夜晚跑, 早上仲要係無咩人, 超正!) 以前玩開physical, 但自從搬家後就因為太遠而無繼續. 月費白交了四個月.

講開運動, 有網友在討論區講到運動對治療濕疹有無幫助. 我可以肯定咁同大家講, 做運動對濕疹的治療一定有幫助. 以我為例, 做完運動, Endorphin的釋出, 心情會好很多. 壓力都會消減不少. 但問題係, 當濕疹發作時又點做運動呢? 以前濕疹發作時, 身體對周邊的物件都會非常sensitive, 我直情對我自己的頭髮都會敏感, 我的頭髮接觸到我的面頰都會痕到飛起. 所以我以前只會剪短髮. 嚴重時還會將身上部份的毛髮剃去, 減少痕痒. 如果病發時, 做運動出的汗會極度刺激皮膚, 加重病情. 所以平時應多做運動. 病發時就可免則免.

預告: 下次會講下紫雲膏 <-- 未寫起. 我習慣將文章切件咁寫, 一得閒就寫, 一得閒就upload. 所以一篇文可能分左兩三次寫. ^^!

<網友交流> 寫 blog 寫上癮?

2009-01-06T13:02:00.020+08:00

(6/1 update): ----------(Happy New Year!)--------- 星期六得10度咋.

大家好, 新年快樂. 身體健康. 我有陣時會係個blog 度講下日常生活的鎖事. 但係入得黎<濕疹玩死我>的網友都係想得到有關治療濕疹的資訊. 有見及此, 我決定為我的生活小記獨立分開一欄, 有興趣的網友遲些可以click 入生活隨筆到睇下.(仲未整好!遲d得閒先整.)

2009 的新年, 我在香港渡過(今年在尖沙咀的天星碼頭旁看煙花倒數, 下面的影片是我拍下的. 和大家分享一下新年的氣氛). 但2010 年的新年, 相信我已經不在香港. 因為我決定要去一年working holiday(預計在09年11月出發).

網友們, Happy 2009!

Working holiday的計劃已經籌備了很久. 為了working holiday的計劃, 我和女友都各有意見. 不時都會因此不和. (又想30歲前結婚又話要達到理想, 究竟仲有2年就30, 係唔係真係夠時間做咁多野呢?) 今次working holiday 的目的地將會係紐西蘭. 因為working holiday的申請必須在三十歲之前. 為了working holiday 我決定放棄我的工作, 做了足足6年的工作.

大家可能覺得奇怪, 點解我會有一份長達6年的工作, 我不是給曾因濕疹辭了職嗎? 所謂的工作, 其實係我和朋友的小生意(蚊型的). (其實我現在可謂一星期工作6天, 其中星期六日做自己的小生意. 其餘的時間打別人的工) 以前濕疹經常病發. 病發時, 我晚晚都不能準時入睡, 有些時候我每天只能睡一兩個小時. (最黑人憎的係朝頭早臨天光(6-7a.m)先訓得著) 我有時會睇書睇vcd攪到自己好累好累, 希望可以睡得著, 只可惜一撻落床, 又"rrrrrr"到, 碌到天光.

所以我明白到如果病發了, 單單靠自己上班賺錢, 根本是很難, 試問誰又會請一個工作不能集中, 成日走去廁所左"r"右"r"的人呢? 靠自己的學歷, 找到一份工作應該不難. 但患上嚴重濕疹呢個病要找份工就真係好難, 如果我唔靠當初自己的積蓄, 轉做打自己工, 恐怕有段時間我要攤大手板問阿爸阿媽攞錢 la. 2002年畢業的我剛剛遇著SARS, 當時D老闆俾的人工真係少得很, 發求職信出去, 回覆的郤很少. 記得當時有間會計師樓出價$5800 請一個 audit trainee, $5800 真係食都唔多夠!

Working holiday 係一個好好的機會俾我見識一下世界, 我已經病夠了, 受夠了. 希望2009年係我和大家多姿多采的一年.
(這篇文章將被分類到生活隨筆欄內.)

預告: 下次會講下紫雲膏.

<濕疹 VS 西醫> 衛生署何景文醫生訪問

2008-12-29T11:30:00.017+08:00

今個聖誕節連續放左幾日假, 唔知大家有咩節目呢? 我就同我的中學朋友出來吃飯和去了一個短短的旅行. 出來工作後, 朋友們各有各忙, 對上一次出來吃飯都已經是大半年前的事. 見到讀書時的老友本應非常開心, 但我覺得近幾年我們的飯局越來越沉悶, 每次的飯局都會不斷 playback 以前中學的往事, 講下邊個邊個老師的瘀事, 講下沒有出席的朋友的"近"況(所謂的近況, 可能已經係三幾年前). 以前一班每天相見, 一起打波, 打機的好友, 近幾年我們的距離好像拉遠了. 變得越來越陌生.

雖然近年出席飯局的人數沒有像金字塔般不斷下降, 但原因只是我們的"攪手"不斷聯絡一些甚少出席的同學, 致電給班上那些不太熟絡的同學才能維持飯局的人數. 其實每一段關係, 無論是親情, 友情及愛情都要努力經營, 我自問我對朋友間的感情比較忽視, 很少會主動聯絡我的中學, 大學的舊朋友. 我們的關係走下坡是理所當然的. 如果沒有班中的中堅份子, 恐怕我和我的朋友已經失去聯絡.

講開今次聚會, 我地去左灣仔打邊爐. 打邊爐的確是一個不錯的選擇, 可以揀自己喜歡吃的食物, 雖然我現在的皮膚情況依然v.good, 但我還保持介口的習慣. 有些食物我堅持唔食, 例如牛, 荀, 蝦等, 但有些食物(例如, 羊, 鱔, 魷魚等)我總會在佳節下放縱一下自己, 抱住食少少無妨的心態. 以前同朋友吃飯, 呢樣唔食得, 果樣唔食得, 真係煩死人. 和老友吃飯還好, 和新相識的朋友或者客人, 很怕給人"唔賞面"的感覺. 其實, 我很鍾意喝紅酒, 可惜每次喝酒後皮膚都會痕痒, 而家好番後間唔中都會喝少少, 要自律呀!

以下是三段錄音, 其實我把呢三段錄音upload左上youtube 好耐, 但一直都唔得閒擺上blog. 可能好多網友都會聽過. 這個節目是RTHK 2008年9月11日的<精靈一點>, 我將佢分為3段.

第 1 段:
1. 空氣污染的地方患濕疹的病人比較多?
2. 香港患濕疹的人比外國多?
3. 花粉引起濕疹?
4. 食物令濕疹嚴重只佔百份之10?

第 2 段:
1. 護理濕疹皮膚.
2. 濕疹因為太濕?

第 3 段:
1. 濕疹會否痊癒?
2. 經常用藥還是短期用藥?
3. 藥膏試用多久?

<以上有些意見和我的見解不同, 僅供參考. >

<網友交流> 我的插畫1- 記錄患病經歷

2008-12-15T14:15:00.022+08:00

上星期六, 原本諗住上TVB.COM睇下最新一輯<新聞透視-再見股神>, 點知都未upload 上去, 無辦法la. 遲d先睇la. 後來睇左上一輯的<鬱到病>, 人地成日話無綫d節目唔好睇, 無教育意義, 我就覺得都ok la. 其實睇下你點揀, <奬門人>就梗係無教育意義la. 得啖笑, 娛樂下之麻. 但講到<新聞透視>和<星期日檔案>等節目都很有水準.

點解我會提到<新聞透視>呢? 原來<鬱到病>果集講到一個患有抑鬱症的插畫師, 佢將患抑鬱症的經歷畫成一本畫冊. 所以我都貪得意畫左一幅, 希望大家都可以苦中作樂.

以上的插畫係我的個人經歷, 我記得有好幾次坐巴士的時候有乘客發現我脫皮, 當時我患濕疹的情況真的很嚴重, 原先向我附近找坐位的幾個乘客見到我都立即掉頭走開, 我當時真係好難過. 但我又覺得佢地的反應是可以理解的, 佢地又唔知我有咩病, 怕會傳染到佢地. 其實我都覺得很不好意思, 因為每次坐巴士後, 我都會留下一堆皮屑在巴士的坐位上, 很核突. 我都盡量用紙巾抹掉或會將皮屑掃在地上. 所以濕疹嚴重時, 少不免我都唔會出街, 怕別人歧視的眼光, 又怕影響別人.

<網友交流> 我的皮膚現況

2008-12-02T09:41:00.046+08:00

之前有些網友問我近期天氣轉冷, D皮膚的狀況如何. 通常我會回覆佢地話D皮膚比之前乾左少少. 情況都依然很好, 很滿意. 之但係講又唔係太清楚, 點為止很好, 很滿意呢? 所以我索性將我的"玉照", 唔係...係"肉照" post 上網俾大家睇, 又可以作為個人的記錄.

(我專登一起身唔洗面, 唔搽保濕, 總知咩都無做, 就影左呢幾張相. 你地見到我D皮膚上除左有小小粒粒, 大致上都很好.)

我盡可能一個月update一次我的"肉照"一次, 希望大家唔好睇到食唔落飯就好la. (食唔落飯都算la, 嘔就無謂啦!)

(圖片來自互聯網.)

為左作好預防濕疹的準備, 上個月買左一樽綠茶粉沖黎飲. 呢樽綠茶粉唔係顧小培先生果種. 而是係日本超市買的. 唔經唔覺都食左兩三個星期 la. 我成日都好想知道究竟綠茶素/洋蔥素的成效如何? 有網友曾經問我, 你唔係好番哂啦咩? 問黎做咩呀?

好番哂? 我真係唔敢講. 我只可以話俾大家聽, 我的濕疹皮膚已經無番發一段時間LA. 至於係唔係治根, 我相信要等到我再病發(touchwood, touchwood....), 又或者我死前的一刻先可以話俾你地知la. (睇黎果時<濕疹玩死我>呢個blog都摺左好耐la. 到時都唔知點通知你地. 哈哈. ) 現在我飲綠茶粉的目的只係做好準備, 至於病唔病發. I have no choice.

另外, 我想知道綠茶粉/洋蔥素幫唔幫到大家, 自己好番, 都好想其他人都好得番. 患濕疹實左太折磨la, 躊躇滿志的一個人, 一而再, 再而三受病魔所折磨, 一年三百六十五日, 有最少三四個星期要趟左病榻上, 有學番不得有工番不得, 你說是多慘呢?

不過, 大家都唔駛咁灰. 我其實好有信心呢一年, 下一年, 再下一年... 再下幾廿卅四五六七八十個年頭...我D濕疹都唔會再番發. 我呢個人比較鍾意居安思危. "learn" d 都要講句, 世上無難事, 只怕有心人. 你都會好得番.

好搞笑, 我果日手多多將D綠茶粉放左入個口到, 諗住食一啖. 點知D粉攪到我"濁"到, 咳左一陣. 下次都係唔好咁口多la. ^^!

Think positive! 個人開心d. 濕疹走快d.

我真係好怕濕疹再番發. 我係discuss見到有個網友因為濕疹病發番唔到學成個月. 番唔到學當然可惜, 但都可以自修一下. 如果你人緣好, 找老師同學仔幫下手, 教下你, 好快追得番. 再唔係, 咪去找個補習老師番黎教下你.

相對黎講, 番唔到工就大件事, 如果番唔到工, 你就買唔起幾百呎, 豆腐潤咁小的"豪宅". 又買唔到一罐成本幾蚊但係幾經包裝後, 買到廿幾蚊的一罐"午餐肉". 所以有份工做都值得安慰. 辛苦d都無計la.

而家有些大公司, 大企業根本毫無社會良心, 一見勢色唔對, 就裁員減薪. 食品, 油費只會加快減慢. (百佳同惠康仲要逆市加價) 真係黎哂大譜. 我地呢一代的香港人, 好似已經接受左, 妥協左, 我們再沒有討價還價的餘地la.

"慳得一蚊得一蚊?" - 我呸! 唔該d大企業唔好張開眼講大話. 扮哂好人. 我最x憎!

(圖片來自蘋果日報)

http://appledaily.atnext.com/template/apple/sec_main.cfm?iss_id=20081201

<濕疹 VS 護理> 防蟎, 成人及小兒濕疹短片

2008-11-24T17:49:00.029+08:00

唔知點解UPLOAD左幾次畫面同聲音都係唔同步. (25/11 joeyad's update: problem fixed!)

尋日放工番黎真係攰到暈, 本來想連飯都唔食就走去訓. 點知就係呢個時候, 有個舊同事打電話黎, 一傾就傾左個幾鐘. 傾傾下又好似唔係好眼訓. 不如上網update下個 blog 和check下email. 先知道原來呢幾日天氣一轉, 好多濕疹病人d濕疹又黎探訪. 冬天啱啱先開始, 大家真係要小心小心. 我都要提起十二分精神, 唔可以鬆懈.

我係discuss見到病友話做左skin patch test. 其實skin patch test都有幫助, 等你知道自己對咩有敏感, 盡量避開致敏源. 對好多濕疹的病人來講, 常見的致敏源係塵蟎. 有d病人都會走去買防蟎的用品. 但係大家要留意, 防蟎的床上用品有平有貴, 坊間有些聲稱防蟎的用品其實係魚目混珠, 尤其是$500以下的防蟎套裝, 購買前真係要諗清楚.

之前同大家講過, 殺蟎可以用<殺他死>的滅蟎劑. 我仲有一個簡單超平的方法介紹一下, 就係將d枕頭同被放入一個黑色的垃圾袋到, 再將佢放係太陽下晒佢3-4個鐘. 由於黑色吸熱的關係, 袋裡的溫度比直接放係太陽下晒高得多, 足夠將蟎殺死. 大家不妨試下la.

(上面的報紙係我好耐之前係互聯網找到的, 原文已經搵唔番la. >.<)

上個星期, 天氣一轉, 我氣管的老毛病又發作. 好多病友都知道哮喘, 濕疹同鼻敏感係"三兄弟", 有濕疹的病人好多時候氣管都會比較弱. 有d濕疹的病人係冬天的時候都很怕穿得太多衫, 因為怕"焗親"d皮膚. 情願凍親都唔情願見到濕疹呢個親戚.

講番正題, 今日我upload左一段短片上youtube. 頭一PART係顧小培先生有關補中益氣湯(不過得55秒咋)的介紹. 另一PART係講小兒濕疹同埋成人濕疹.

中藥方劑的詳情:

「中藥西研」「補中益氣湯」
補中益氣湯的成份是：北芪 (4 錢 ) ，人參 (4 錢 ) ，白朮 (4 錢 ) ，當歸 (3 錢 ) ，柴胡 (2 錢 ) ，大棗 (2 錢 ) ，甘草 (1.5 錢 ) ，升麻 (1 錢 ) ，生薑 (0.5 錢 )
中醫理論：＊補氣法：適用於呼吸少氣，動則氣喘；＊北芪益氣，白朮健脾，當歸補血，陳皮理氣。

有買過顧先生綠茶/洋蔥素吃的網友, 請報告一下現況. 發揚一下互相幫助的精神. thkx!

<濕疹 VS 護理> 壹週刊文章－秋癢

2008-11-17T10:07:00.039+08:00

秋癢

阿梅個眼袋大到可載一個五元銀幣，晚晚都無覺好，唔殘有鬼！唔通她有心事，弄到失眠？非也，原來阿梅唔知乜事周身痕，搞到難以入睡，睡得不好，唔只樣殘，還十分傷身，精神肉體都飽受折磨。這本來是很簡單的一個問題，阿梅就是不去處理，忍熬，愈積愈嚴重，阿梅身體現在已變得很差，經常病，若繼續下去，慢性疾病、包括心臟血管疾病、癌病都有可能出現。

阿梅其實只不過是 患上皮膚乾燥 小問題而已，但病徵（痕癢）就後果嚴重。乾燥皮膚（ XEROSIS ）是很常見的，一般是源於以下原因：

（一）自發的乾燥病；

（二）老年人的乾燥病；

（三）停經後的乾燥病；

（四）因疾病引起的乾燥病，例如糖尿病、靜脈曲張；

（五）藥物（包括 類固醇 ，醫暗瘡的 RETINOIDS ）引致的乾燥病；

（六） 濕疹 ；

（七）牛皮癬；

（八）魚鱗癬（ ICHTHYOSIS ）；

（九）經常接觸水和清潔液的後遺症；

（十）氣候的因素（乾燥的秋天或是經常開冷氣的環境）。

我們皮膚「表皮角質層」內的「水解」（ HYDROLASE ）在 PH5.5 的環境下，就會活躍起來，把鬆散的表皮皮脂重整排列，成為可抵禦環境侵襲的一塊雙薄葉片形皮脂組織（ BILAMELLARY LIPID STRUCTURE ）。

皮膚乾燥的人，表皮的 PH 是超過 6 的，因此，表皮皮脂鬆散，表皮水分容易被蒸發，皮膚便變得乾燥痕癢。因完美的雙薄葉片受損，就更容易招致不良環境因素的侵害。用 PH5.5 的清潔液，才適合阿梅等患上皮膚乾燥的人。用鹼性高肥皂類的清潔液，只會令皮膚變得更乾更痕，因為水解要在 PH5.5 時才運作得好，令皮膚變得健康，緊鎖水分。含有牛油果（ AVOCADO OIL ）和卵磷脂（ LECITHIN ）的清潔液可減少皮膚乾燥，因為它們屬於 SKIN FRIENDLY 油質。

在秋冬乾燥的時節，更要 搽潤膚露（ LOTION ）去抗乾 。皮膚敏感的人， 切不可亂用含化學成分令皮膚過敏的產品 ，否則皮膚不只乾燥痕癢，還會又紅又腫。含天然植物固醇（ PHYTOSTEROLS ）的潤膚露，去紓緩乾燥敏感的皮膚就最好。要更加滋潤，就用 CREAM BASE 。各位，切不可因為皮膚乾燥而不好好處理，弄致自己好似阿梅一樣呀！

作者：關嘉美醫生，是《潮＋美生活》、《美食新觀點》、《嘉美看健康》專欄作家。愛樹、愛海、愛工作。

SOURCE: 第 973 期香港壹週刊

Joeyad:

雖然皮膚已經好番一段日子, 但絶對不能鬆懈. 不想自己再次跌入黑暗恐佈的日子裏. 乾燥的冬天已經殺到, 黎緊的星期四只得15度, 有如大敵當前, 必須嚴陣以待. 有見及此, 我決定在這裏寫下"告別濕疹應戰準備"提醒自己唔好掉以輕心.

準備1:

<網友交流> 你不是獨單的.

2008-11-07T14:13:00.055+08:00

自從<濕疹玩死我>這個blog曝光之後, 我收到很多網友的email及在discuss討論區上的pm. (這裏留言卻很少, 可能blogger留言太麻煩有關.) 勾起不少我患病時的恐怖回憶. 以前我一直以為患嚴重濕疹的病人很少. 記得以前出街會細心看看街上的行人, 看看有多少人有嚴重濕疹. 行了很久, 通常都沒有發現. 心裏會想: 又話香港十分之一人有濕疹, 點解行左半日街都無見到一個呢? 唔通嚴重濕疹都唔出街, 還是嚴重濕疹的病人只係寥寥可數, 只得我一個呢?

現在我可以告訴大家(尤其是正在患病的你), 你不是孤獨的, 請不要灰心. 以前看過一些新聞, 報導中說到一些患有皮膚病的病人, 因為受不到病魔的折磨而輕生. 覺得真是可惜! 其實每個人都有自己的苦處, 沒有濕疹的人, 也會有其他的問題, 無論係肉體上, 心靈上或者家庭問題上, 所以不要羨慕別人, 幸福其實還在你掌股之內.

我記得之前去港大金鐘的診所看中醫, 那是位教授級的中醫, 當時有四位中醫的學生在場, 他和那四位學生, 患嚴重濕疹的病人係特別聰明的. 我在心裏面想, 呢位教授不愧係教授. 一眼就看得出, 我是特別聰明的. 哈哈. (我從來也覺得自己比其他人聰明. 只是以前因為病到九彩, 而自信心比較低.) <-- 我係唔係好黑人憎呢? ^O^

黑色劃去的是一些私人的問題, 所以不post出來la.) (其實post呢封email時, 我還未問yin可否post出來, 如果佢唔同意, 我遲d會delete左封email.) 收到呢封email, 勾起了不少我的回憶及感受.

和阿yin一樣, 濕疹這個病也曾是我的包袱, 也是我屋企人的包袱. 屋企人的關懷備至, 有時令我更加痛心, 花了很多的金錢也得不到效果, 好像把金錢倒進一個無底深潭, 沒完沒了. 我也曾經試過放棄, 覺得反正醫不醫也一樣, 不如慳點錢還好. 慳到的錢足夠家庭的生活基本開支, 但是誰又甘心一世這樣渡過呢?

(題外話:宜家咩都加哂價, 記得我係超市買西柚汁飲. 一兩個星期前都係$11.9, 宜家"破底價"竟然要"$12.9", d超市張開眼講大話, 真係離哂大譜, 你當我盲ga, 定係失左憶呀? 我想知咩叫做"破底價"呀? 唔通貴個之前個價就叫做"破底價"呀?)

屋企人很疼錫我, 記得有一次我的濕疹病發時, 放學回家後(當時我中六七到la)我打開了雪櫃, 發覺差不多半個雪櫃都放滿了龜苓膏**, 係爸爸媽媽買回來的. 他們知道我痛得很辛苦, 所以買了十多盒龜苓膏給我吃, 希望對我的病情有幫助. 大家都知道龜苓膏是頗貴的食物. 他們買的都是名牌老店做的, 不是那些大陸做的那些"涼粉". 這時我真的很感動, 而且非常內疚. 平時父母只會慳自己. 有了我和妹妹以後, 為了家庭, 幾十年來都沒有去過一次旅行, 有時他們的衣服"穿"了補補再著就算數, 卻時常為我和妹姝添新衣裳. 如今我二十八歲了, 工作日忙夜忙, 為組織自己未來的家庭, 為結婚, 營營役役. 對住電腦, 女朋友, 朋友, 同事的時間比對住家人的時間還要多很多...... 想到這裏, 心裏有點難過, 下次再談吧.

**註: 我個人認為龜苓膏對濕疹皮膚幫助不太.

<濕疹 VS 西醫> 皮膚科專科史泰祖醫生有關濕疹的訪問 ALL PARTS

2008-10-31T11:15:00.034+08:00

呢三段片係我於2007年10月15日<都市閒情>的片段. 今日終於得閒將第2同第3 part upload上黎俾大家睇. 但係第3段片的聲音同埋畫面唔係好夾. 因為近排好忙, 暫時我唔得閒整番好佢. 大家睇住先la, 我遲D再從新upload上黎.

第1段大概內容:
1. 秋天皮膚護理,

2. 乾燥性濕疹及主婦手,

3. 冬天和夏天的謢膚方法.

(大家記住沖完涼立即搽保濕. 唔係等乾左先搽.)

2008年 11 月3 日 joeyad: updated!

第2段內容簡介:

1. 適合濕疹病人喝用的秋冬滋潤湯水.

2. 家庭觀眾 Q & A.

第3段內容簡介:

1. 類固醇及新藥膏的分別.

2. 中藥的使用.

3. 溫泉對濕疹皮膚如何?

4. 家庭觀眾Q & A.

要記得要身體好係要花心機. 對付濕疹更是要長期作戰. 好番都唔應該鬆懈. (其實我好想多謝我屋企人, 佢地都忍受左我好多, 因為之前我濕疹發作的時候, 成日都發脾四. 我都唔想, 病發的時候訓又訓唔到, 食都無胃口, 好多野都做唔到. 成日怪責自己. 攪到個人好燥.)

雖然短短的25分鐘(共有3段-每段10分鐘左右)的片段, 共花了我5/6小時. 我想和大家分享一下我upload這段片的經過.

首先, 我將段片由我的錄影機harddisk轉到我的光碟. 再由光碟轉到我的電腦, 由於光碟係DVD格式, 用的file係 .vob, 所以我要將這個file轉到avi/rm. 我本身沒有電腦資料轉換的software, 所以就要問我的朋友借左隻winavi. 呢個software好好用, 好簡單. 我之前係網上download過其他的資料轉換的software. 試了我很久也用不到. >.<

花了好幾小時都終於把資料轉了檔(rm) <--轉一個檔要花半小時起碼. 一心想把這段片upload上youtube. 由於這次是我第二次upload片段上youtube. 咩都唔識. 唔知道youtube的段片係有長度限制(每段最長10分鐘). 所以攪到我又要去cut片. 我之前都未試過cut片. 又係我第一次. 蠻好玩. 今次整呢個blog真係學到好多野.

講番正題, 呢段片總共有3段, 包括了西醫史泰祖醫生及中醫崔紹漢博士的訪問. 我宜家將第1段upload上網. 第2段及第3段, 我未得閒cut. 因為第2, 3 段之間有李錦聯教煮餸, 我未得閒cut左佢. (joeyad update: 今日3/11終於攪掂左la.)

(網友nobodyhere話我個blog留意要login先可以留言, 我第一次寫blog. 咩都唔識. 真係好多謝你地比意見我. 我會盡快找方法解決這個問題. 如無沒解決,我會再upload上第二個blog到. 希望大家可以在我的blog留言, 多多交流.) (joeyad update 3/11: 可以留言la!)

<濕疹 VS 西醫> 狂搽類固醇藥膏濕疹童險盲

2008-10-28T18:25:00.010+08:00

狂搽類固醇藥膏濕疹童險盲副作用導致嚴重白內障醫生籲須嚴守處方劑量

【明報專訊】「類固醇是一把雙刃刀！」荃灣港安醫院眼科專科醫生高震宇稱，類固醇可以醫治濕疹等疾病，但亦可帶來嚴重後遺症。他表示有年幼病人因為塗抹過量類固醇軟膏引致白內障，故呼籲市民在使用類固醇軟膏時一定要提高警覺，並須跟從醫生的指示使用。

就讀中一的嘉軒自小受濕疹困擾，8、9歲時病情趨嚴重，經常因為痕癢而失眠，嚴重影響日常生活。他表示﹕「起牀時，牀單滿是皮屑(joeyad: 我以前也是這樣, 早上一起來, 滿床都是皮屑, 我的黑色keyboard, 書桌, 椅子, 沙發, 地下, 公事包都是. 有時坐巴士時都會留下很多皮屑在椅上, 很核突.)，自己也會感到害怕。」

此外，濕疹也影響了他的社交，「在返學途中，皮膚上的傷口會流膿(我以前也是, 真的很無奈, 我做錯了什麼呢?)，返到學校同學會說我臭。」嘉軒父母因此帶他看皮膚科醫生，並跟從醫生指示服用類固醇藥和塗軟膏(所謂的軟膏, 其實也含類固醇, 你可能唔知到, 中藥中的甘草也有天然的類固醇化學成份. 中醫醫濕疹都有時會用到.)，嘉軒媽媽坦言當時只知道服食類固醇可能會引發副作用，卻忽略了軟膏內也有類固醇成分。她覺得醫生處方的軟膏有效，但分量少，遂自行到藥房配藥。

每天塗勻全身需做手術保視力
起初嘉軒尚有跟從之前醫生的指示，塗抹2、3日便停用幾日，但後來媽媽買了一大罐回來，嘉軒每天冲涼後便塗勻全身，濕疹問題的確有改善，但副作用也開始出現。

1年後，就讀小五的嘉軒開始覺得視力模糊，不但影響學業，更影響生活。嘉軒媽媽說：「有一次他看不清是綠燈還是紅燈，僅憑盲人指示的『嘟嘟』聲過馬路。」於是她帶嘉軒到眼鏡店配眼鏡，視光師懷疑他並不是普通近視，建議他到眼科醫生作詳細檢查，始發現嘉軒有嚴重白內障。當時他一隻眼只剩餘二三成視力，另一隻更少於一成，需要立即做白內障手術。 (可能我也有白內障, 物件看來很模糊.)

皮膚薄有損傷用時提高警覺

(全身都係傷口時, 很多事都要小心, 例如游水. 游水(海水)真係痛到死, 比鹽水醃. 加上凍水. double "痛楚"!)
手術後嘉軒雖已恢復視力，但需要長期戴遠視眼鏡，打消了當機師的志願(這也是我的志願, 看看我在discuss的相片便知.)。為免眼球受傷，本身是校隊的嘉軒還要放棄熱愛的籃球運動，並避免一切劇烈運動。他亦需要定期檢查，以防出現後囊膜霧化、青光眼和視網膜脫落等後遺症。

高醫生表示，類固醇軟膏雖然對濕疹有幫助，但使用時要提高警覺，如果患者皮膚薄、皮膚上有損傷及塗抹面積大的話，便容易被身體吸收，影響新陳代謝，在沒有創傷或患上炎症的情况下亦會患上白內障。

白內障會令晶體模糊，影響光線折射，使近視在短期內加深，如不及時診治，會有致盲危險。高醫生呼籲市民一定要在醫生的指示下使用含類固醇的藥物，包括軟膏，更不要自行到藥房配藥。

<濕疹 VS 護理> 多搽潤膚膏預防濕疹

2008-10-27T10:36:00.015+08:00

文章是來自2008年10月25日<東方日報>, 呢篇文章係講濕疹的護理. 其實呢類文章我睇都睇過無數次, 叫我寫都無問題(肯定寫得比佢更好).

多搽潤膚膏預防濕疹25/10/2008
濕疹發作，皮膚痕癢難當，若以手去搔癢，隨時會搞到「損手爛腳」。別以為濕疹必定與「濕」有關，原來秋冬的乾燥氣候，一樣是令濕疹發作的元兇。

天氣乾燥易出現
濕疹與「濕」是沒有必然關係的，當天氣乾燥時，濕疹會較易出現。皮膚科專科醫生周家源表示，濕疹包括異位性濕疹和接觸性或刺激性濕疹，前者多出現於小朋友身上，後者則由外在因素引起，例如接觸到刺激物質，如酒精、化學品、塵埃等，令皮膚受到刺激所致。此外，老年人由於皮脂分泌不足，引致皮膚乾燥，亦可導致濕疹出現。

亂搽藥膏情況更糟
很多人以為，皮膚痕癢時只須到藥房購買止痕藥膏，塗後不會痕癢便等如痊愈，其實這樣做很可能使皮膚受到更大的傷害。周醫生指出，有些病人會誤將皮膚受真菌感染（俗稱皮膚癬）的情況當作濕疹，由於坊間有部分治療濕疹的藥膏含類固醇成分，若使用這類藥膏治療會令情況更差，而且長期使用類固醇藥膏會使皮膚的抵抗力下降，皮膚有可能愈來愈敏感，更易受其他病菌感染。

熱水過熱去掉油脂
要認清自己受哪種皮膚病影響，最直接的方法便是找醫生檢查清楚，對症下藥。其實要避免濕疹發作，是有方法可以預防的。由於患濕疹人士的皮膚多屬乾性，因此洗澡時間不宜太久，並應避免使用過熱的水，因為熱水會去掉皮膚的油脂，使皮膚變得更乾、更敏感。
此外，患者要懂得時刻保持皮膚的濕度，例如多使用潤膚膏，以加強皮膚的油潤度。周醫生說：「當感到皮膚乾燥，便應補充潤膚膏，其作用猶如涼茶，對身體有保護及保養的作用，能調理皮膚，保持健康。」

異位性濕疹多屬遺傳
小朋友患異位性濕疹，多屬於遺傳性，周醫生指出，這種濕疹的出現是由於皮膚的油脂層較薄弱，鎖水功能較差，令皮膚乾燥，因而導致濕疹，但大部分患有先天異位性濕疹的小童，其皮膚質素會隨年齡增長而得到改善，濕疹的情況亦會好轉。
至於因接觸外界物質引起的濕疹，患者只要不接觸敏感性或刺激性物質，減少皮膚受到影響，便能有效控制病情，減少濕疹發作機會。
撰文：何詩敏
鳴謝：皮膚科專科醫生周家源

joeyad 的感受
你地會看到圖片上有些地方用藍筆劃了線. 不是我劃的, 是我屋企人劃的, 他們又再提醒我沖涼時唔好用太熱的水. 唉, 你估我唔知咩. 唔通冬天天寒地凍都用凍水沖涼咩. 我都唔知同佢地講左幾多萬次. 解釋左幾萬次, 好似無次聽得入耳咁. 提完又提. 我知道佢地係出於關心. 但係唔駛"間(劃)"低佢,"間"低佢好似話我唔知咁.

我夠知道熱水會去掉油脂, 我夠知道沖涼唔好沖太耐LA(一般情況我都只係沖十分鐘, 好正常丫). 不過我想話俾D無嚴重濕疹的人聽, 尤其是係身為人父人母的, 濕疹病人自己都唔想受苦. 佢地都知到用熱水沖涼係對皮膚唔好. 但係有時係身不由己, 尤其是當傷口脫皮流血的時候, 用凍水沖涼真係會通到阿媽都唔認得. (用熱水, 尤其是係極熱的水可以用它的熱力麻醉自己的痛) 我曾試過好多次因為個傷口流血後黏住左件衫. 用左溫水沖左十分鐘都沖唔甩, 溶唔甩. 索性合埋雙眼, 用力址開佢. (以前沖涼痛自己要左閃右避, 成日係到呻吟咁.有時仲會痛到係沖涼房大叫.有D濕疹病人甚至乎要打鎮定劑.但我堅持唔打.)

無濕疹的父母你地試過未丫. 根本你地就永遠都唔會了解我地嚴重病人的苦, 感受我們的痛! 就正如一個男士永遠都感受唔到懷孕的苦樂一樣. 最後我想提醒大家, 請不要責怪患有濕疹的子女, 他們會很難受. 可能你覺得是出於關心的說話, 但必須三思後才說, 否則會加重病者的心理壓力. 可能你們會覺得我無理取鬧, 但我相信我所說的, 正是嚴重濕疹病人的心聲.

<藥物及健康食品篇 1>

2008-10-23T14:35:00.013+08:00

(1) 琉璃苣油
(6) 皮得露

(7) 施巴沐浴露

(8) 濕疹清

(9) 維他命 B 雜

(10) 海運保濕乳

係呢頁我會介紹下一些坊間有關醫治濕疹的藥物及健康食品.
我未用過的健康食品:
(1) 綠茶素及洋蔥素
呢兩種食品我都係最近先知道, 係因為12/10/2008<星期日檔案>的<食得有價值>報導過. 我立即上網找資料希望幫到大家, 我仲upload左條片俾大家睇. 大家可以在呢個blog找到. 我有好多濕疹fd同網友, 大家得閒都會交流下心得. 我記得有個fd佢之前有濕疹好似用過綠茶素及洋蔥素. 立即打電話問下佢. 一問之下, 原來佢真係有用過綠茶精華, green tea extract同洋蔥素quercetin. 如果大家想買, 可以去顧小培的店買. 又或者 contact我. 一般來講green tea extract $150-$200/200粒. 多d人買可以平$10零$20到la.

全部下面的藥及健食我都用過:
(1) 月見草油丸 Evening primrose
<-- 我之前係美國訂開, 一樽$60左右/60粒. 外國有好多人話食左月見草油丸D濕疹好番哂. 但對我來講, 效果普通. 如果大家想訂可以contact我. 我可以幫大家. 其實屈臣氏同萬寧都有得賣. $100 /60粒左右到la. 如果大家覺得用盡方法都醫唔好, 可以試試 la.

(2) 琉璃苣油丸 Borage oil

<-- 呢隻藥係女性用來調理乳液分泌用的. 有d人話用左個胸大d喎. 網上的資料亦有顯示, 琉璃苣油丸可以令乾燥的皮膚變滑. 有濕疹病友話成效幾好. 食左唔駛成日保濕喎. 大家可以係屈臣氏, 萬寧同藥房找到. 你亦可以contact我. 我可以幫大家找. http://www.wretch.cc/blog/junolee/13690427

(3) 亞麻籽油丸 Flaxseed oil
<-- 我之前都買在幾樽. 係屈臣氏買的. 好似$45x/ 3樽.

(4) 氯咪林乳膏
<-- 有類固醇成份. 少用為佳. $1x 到一支. 大陸買會平d.

(5) 皮炎平
<-- 有類固醇成份. 少用為佳. $1x 到一支, 大陸買會平d.

(6) 皮得露
<--幾好用, 我之前病發的時候, 因為成身都係傷口, 沖涼痛到我死, 但係都要沖. 唯有用皮得露沖. 佢都OK好用. 沖完之後無咁痕. 不過佢係黃黃地色. 好易會染到D衫. 仲有佢有D醋酸味. 可能有d病人會唔鍾意la. 屈臣氏, 萬寧同藥房有售. 藥房會平d. $100左右/1支.

(7) 施巴沐浴乳
濕疹的病人皮膚好sensitive. 唔可以用普通的沐浴乳沖涼. 我一直都係用施巴沐浴. 佢適合敏感的皮膚. 之前皮膚差時就會用皮得露. 好就會keep住用施巴. 宜家好番哂就用咩沐浴乳都 no problem la. 幾多錢我都唔記得左. 好耐無用 la. 大家睇下相都知啦!

(8) 濕疹清
我之前都有買開, 而家用剩半支. 我覺得對我就完全無用. 不過大家都可以買來試試. 人人體質唔同嘛! $9x - $1xx左右/1支.

(9) 維他命B雜同BIOTIN
我之前問過個營養師朋友, 佢suggest我用維他命B雜同埋BIOTIN (又稱維他命H). 佢話對皮膚好. 大家可以試下LA. 不過幾多錢我就唔知LA. 因為我係問我個fd攞的.

(10) Sea beauty spa power Body moisturizer (very dry skin)
呢隻保濕液我宜家都有用緊. 都幾好用, 不過都好貴下. 我女朋友之前送左幾支俾我, 係佢介紹俾我用. 我係度多謝佢. 佢份人真係好好嫁. ^^! 如果大家想買可以上網找找, 我之前係醫院的counter做promotion買的. 而家推廣完la. 之前旺角新之城好似有問鋪仔賣sea beauty海運的產品. 不過宜家仲係唔係度我就唔知la.

<網友交流> 我曾是嚴重濕疹病人

2008-10-23T11:45:00.013+08:00

係呢一版我想俾大家睇下我以前D相, 但係以上的相片並不是在我最差的時候影的. 因為在我皮膚最差的時候, 根本就無心機影相. 在我最差的時候, 我曾試過差點張不開眼. 由於很怕光線, 一般的情況都不會把燈開得很光. 要把雙手綁起才能睡. 我試過用手套. 最後連手套都抓穿埋. (相信最嚴重的網友才會試過, 情況中低度的網友可能會以為我吹水, 我之前有個補習學生佢有輕微的濕疹, 佢介紹我去睇佢過西醫. 佢話一看就好番哂. 看看她的藥, 我說不必la. 又係steroid, steroid我都有la. 個個西醫唔係開steroid就係protopic普特皮- (局部免疫調節劑) <--(遲D再講) + 抗敏藥. 佢根本唔會明白, steroid 根本對我起唔到實質的作用.)

唔係嚴重的病人真係唔會明, 好似我阿爸阿媽咁, 一見到我皮膚變差, 就問我係唔係出街又食左D咩唔應該食的食物. 我根本就無, 我的生活真係食無味. 我戒口都戒左好多年, 我淨係食豬肉, 雞肉, 菜和飯. 基本上, 其他食物都無掂過. 例如牛肉, 蝦, 鴨(不過有一段時間有食, 因為當時睇緊個中醫, 佢叫我食, 佢話鴨滋陰喎, 食下會對皮膚好. 我睇左咁多個中醫基本上個個都叫我唔好食, 佢反而叫我食, 真係莫名其妙. Anyway, 呢個醫生都無醫好到我. 仲洗左我$20000幾蚊. ), 鵝, 海鮮(魚都很少吃, 尤其是不可以吃無鱗片的魚.) 我遲些會打過戒口食物的清單給大家參考.

<濕疹 VS 健康食品> 星期日檔案顧小培訪問

2008-10-23T10:32:00.012+08:00

(本來我自己UPLOAD左一段上BLOGGER, 朝早仲開到但係人流一多就睇唔到, 所以我係YOUTUBE找了一段, YOUTUBE應該會穩定d. 由ncdart提供.)

節目中邀請了一位8歳小朋友患有濕疹一同接受訪問, 講述她服食了補健系列的"皮膚濕熱'對她的病情的幫助.

如果大家想買黎試, 下可以到http://hk.myblog.yahoo.com/kusiaobei 呢個係顧小培的blog. 我唔係賣廣告. 我都唔認識佢. 佢有間shop:

店名：匡和補健食品有限公司
地址：尖沙咀東部麼地道62號永安廣場UG11號舖
營業時間：星期一至日（包括公眾假期）10:30 am - 7:30 pm
如欲光顧或參觀，為免閣下久等，敬請先致電（Tel : 2524 6677 or Mobile : 6111 9765）。

佢有無賣廣告成份, 我就唔知 la. 如果大家有興趣買綠茶素亦都可以找我. 我之前有濕疹朋友有用過, 可以幫大家訂. $150-$200左右 la (綠茶素200粒/美國製造). 如果多人訂可能會平D. 希望幫到大家.

<濕疹 VS 西醫> 「硫唑嘌呤」治兒童濕疹

2008-10-23T03:23:00.003+08:00

(星島)10月14日星期二 05:30
(綜合報道)
(星島日報) 本港約一至兩成小童受濕疹困擾，中大兒科研究顯示，服用口服藥物「硫唑嘌呤」（azathioprine）有助調理嚴重濕疹，七成患者用藥後，皮膚的乾燥及痕癢情況有改善，由逾六成皮膚受濕疹影響減至四成。不過，負責研究的醫生強調，藥物只可作調理濕疹，濕疹仍會復發，患者仍須配合潤膚等多管齊下控制病情。

　　中文大學醫學院兒科學系副教授韓錦倫表示，濕疹多由鼻敏感、免疫系統失調等所致，約九成於五歲前發病，嚴重濕疹患者會常感皮膚乾燥、「超級痕癢」等，致睡眠質素下降，甚至會把皮膚抓損、令皮膚滲血、滲水、脫皮等。

　　韓錦倫於○五年十一月至去年十二月，為十七名於威爾斯親王醫院求診的嚴重濕疹病童，處方口服藥物「硫唑嘌呤」，觀察其三個月及半年後反應。研究發現，約七成患者的痕癢及皮膚乾燥情況有改善，濕疹遮蓋身體面積由逾六成降至四成，尤以女童的效果顯著。

　　有關研究即將發表，但韓錦倫強調濕疹不能根治，「硫唑嘌呤」主要改善人體免疫系統，以減敏感；由於「硫唑嘌呤」會影響肝功能，曾有研究指約一成曾用該藥的成年人肝酵素上升，若不停藥可能致肝炎或肝硬化等，故必須密切監察。

記者黃穎妍

<濕疹 VS 健康食品> 月見草專題研究

2008-10-23T02:43:00.006+08:00

月見草的學名為Denthersteraptera，原產於墨西哥和中美洲地區，因為這種植物只在傍晚開花白天凋謝，所以又名「Evening Primrose oil」中文又翻譯為「晚櫻草」。月見草油含有大量的必需脂肪酸 - γ-亞麻油酸（GLA），其活性比亞麻油酸高了十幾倍，並且最早利用月見草來治療的疾病是多發性硬化症、異位性皮膚炎、風濕性關節炎。月見草原產於美洲一代，印地安人在數百年前就已發現月見草的醫療價值，將整顆的月見草浸泡在溫水中，製成湖狀的膏藥治療淤傷並且也將之敷於皮膚表面用來治療皮膚的外傷與皮膚炎。

月見草的兩大神奇成分月見草含有大量的必須脂肪酸以及GLA：γ-亞麻油酸，

濕疹與異位性皮膚炎
我們常稱有異位性皮膚炎的人是「體質」的問題，通常患者都有程度不等的皮膚問題，易乾癢，常因不明原因過敏，在氣候變化劇烈或極端的環境下，皮膚無法提供必要的保護，也讓患者癢痛難耐。所謂「體質不好」，有一個常見的原因是患者雖然有足夠的必須脂肪酸的攝取，但是體內卻缺乏足夠的轉化機制，所以還是無法合成必須的γ＿GLA等物質，這時使用月見草直接補充GLA就成了很卓越的營養補充計畫。在實驗研究中，發現月見草在口服與皮膚塗抹吸收兩種方式中，都有不錯的成效，不過在處理濕疹時，必須塗抹月見草油在健康的部位才能吸收，若是塗抹於患部適得其反。

月見草與皮膚
缺乏必須脂肪酸，會使人的皮膚發生水分散失、乾燥老化...等症狀，德國研究人員曾利用一種能測量皮膚光滑度的儀器，來研究月見草油對皮膚的影響，結果發現不管是用口服還是直接塗抹，月見草油都能讓實驗對象的皮膚更光滑更有活力。這類的實驗更鼓舞研究人員對指甲、眼角、頭髮...等身體表面各部位做更深入的研究與測試，結果發現月見草油的應用層面是廣泛的，這使得許多知名的藥妝業者紛紛採取月見草油作為保養品的重要而高檔的成分。

全部文章: 月見草專題研究 yahoo 奇摩健康
http://tw.health.yahoo.com/040105/28/e3nb.html

<濕疹 VS 健康食品> 月見草油和亞麻子油丸

2008-10-23T01:59:00.007+08:00

係屈臣氏買的亞麻子油丸, 要成$4xx/ 3樽. 俾自己訂貴左好多.

我吃開的月見草油丸

講到月見草油丸, 大家都以為淨係女性先至用得. 可能係因為月見草油丸係俾女性作舒緩月經不適之用. 其實月見草油丸男女都可以用得. 至於有無效就因人而異. 對我來講. 用效不大. 但係我見到一些外國的網頁同埋一個韓國留學的一個香港濕疹病人的網頁. 佢地都話吃完好番哂.

以下係佢地的website, 係我之前找到的. Bookmark下都幾有用的.
外國濕疹病人的網頁:

http://www.shirleys-wellness-cafe.com/eczema.htm

韓國留學的香港濕疹病人網頁:

http://hk.myblog.yahoo.com/eczemafighter/article?mid=285

我都有訂開月見草油丸同埋亞麻子油丸. 我買的都係美國生產同進口的. 有需要的病友, 可以找我. 你地亦都可以係屈臣氏同埋萬零買到. 大概$130至$200一樽到 la. 比直接向生產商購貨貴30%左右.

<濕疹 VS 西醫> 治療皮膚病慎用類固醇

2008-10-23T00:32:00.005+08:00

<大家要留意> 內地生產的「皮炎平」，在深圳街頭隨處可買，聲稱可消炎、止癢、抗敏、治理濕疹及皮膚炎。皮膚科專科醫生指出，這藥膏含抑制免疫系統的強力類固醇「地塞米松」（dexamethazone），只適用於嚴重皮膚問題，否則容易出現皮膚萎縮、骨骼問題及肥胖等副作用。(明報 OL 網)

全文: http://ol.mingpao.com/cfm/wealth5.cfm?File=20080620/web05/gzb3.txt

由於張圖唔係咁清楚, 所以俾條LINK大家. www.hku.hk/facmed/healthedu/issue200/issue200.pdf

<濕疹 VS 西醫> 類固醇的副作用

2008-10-22T23:56:00.001+08:00

類固醇的副作用及其使用的一些問題
新光醫院神經科陳俊榮醫師

何謂類固醇？所謂類固醇，它是一群結構與類固醇類似的物質，執行體內許多重要的生理功能（如雌性激素、雄性激素、膽固醇、腎上腺皮質激素…等等）。如果運用人為方法，可以製造出許多和這些分子結構類似的物質。當大量使用時則具備一些藥理作用，可用來治療或控制多種疾病（肌無力症即為其中之一）。

Prednisolone（俗稱美國仙丹）即是一種人工合成的類固醇，它是肌無力症最常用的藥物之一。固然它的藥理作用可用來控制疾病，但因它作用太廣泛了，也常常帶來許多的副作用。由於體質因素、劑量高低、服用期間長短……等許多因素的影響，副作用的表現與程度常因人而異。有些人很輕微或不明顯，有些人則較顯著。一般說來，劑量愈高，使用愈久的病人副作用常愈明顯，有些人則較顯著。一般說來，劑量愈高，使用愈久的病人副作用常愈明顯。然而為了疾病治療上的需要，醫師常會在副作用可忍受的範圍內使用最低的有效劑量. (無錯, 我就係咁la!)

臨床表徵
外觀方面：常見到的是食慾變好體重增加，臉變得較圓（俗稱月亮臉），看起來變胖了。頸背部突起（俗稱水牛背），身軀變胖（尤其是腹部），四肢則變得較細瘦，主要是脂肪移積到腹部所致。

皮膚方面：皮膚變得較薄，下面的血管因皮膚透明度增加而使臉色看起來較紅。(我都有呢個情況 , 我之前d皮膚超乾, 係大脾到有手指好細力畫一下, 就會出現一條白色痕, 有時仲會一畫即刻流血.) 胸部、腹部、大腿有時可見紫色條紋，容易有瘀青現象，傷口癒合較差。青春痘有時也會很明顯。 (但係我無暗瘡喎! 可能因為我之前d皮膚超乾啦!)

骨骼方面：因骨質流失較易產生骨質疏鬆現象，不慎跌倒時比較容易發生骨折，所以應增加鈣質的攝取。另外有些人在長期服用後，大腿骨頂端的股骨頭較易發生壞死現象，必要時要開刀置換人工關節。

肌肉方面：劑量太高或時間太久，有些人會有臀部、甚至肩部肌肉無力現象。較厲害時可見到肌肉萎縮，停藥後常可慢慢恢復。

高血壓：少數人在長期服用後，會有血壓升高的現象。因此定期量血壓可早期發現這種情形。
糖尿病：服用類固醇有時會使血糖增高。當有明顯的多吃、多喝、多尿（三多）時，則要小心糖尿病的可能性。有時定期查驗血糖也可早期發現。

免疫抑制：類固醇會壓抑免疫系統，使身體對病菌的抵抗力降低，較易引起感染。感染後恢復也會拖得較久。

眼睛方面：少數病人會有白內障或青光眼的現象，但此並非很常見。有此疑慮時考慮由眼科醫師追蹤檢查。

消化道潰瘍：服用類固醇時有些人較易引起消化道潰瘍，加服胃藥可改善胃部不適的症狀。另外，長期使用類固醇的病友，因身體產生腎上腺皮質荷爾蒙的機能已因長久抑制而降低，本身產量極為不夠，此時最忌突然停藥，會有許多不舒服的症狀產生，如全身倦怠、關節酸痛….等等，嚴重時甚至會有意識不清等現象。

所以在病情改善或其他問題需要減量或停藥時，醫師們都會很小心，耐心地慢慢減量下來，使身體能夠適應，才不致有不舒服的病狀發生。 (無錯, 我停用類固類後, 出現俗稱的<類固醇反彈>, 一般會維持幾星期至數年<--我睇書睇番黎的. 我自己就維持左一, 兩個月到, 話哂都用左十幾年, 一停用個免疫系統都適應唔到. 係果兩個月內, 我一共瘦了10幾20磅. 又脫皮又流血, 眼都差點張不開. <--你可能唔信, 或者覺得我誇大. 如果我唔係過來人, 我都唔信濕疹可以折磨到一個人到如斯田地.)

轉載自 86 年新光醫院肌無力症(這篇文章係講類固醇對肌無力症的副作用, 但係我覺得
同濕疹一樣)俱樂部五週年專刊
http://www.skh.org.tw/neuro/mg/takecare/reaction.htm

<濕疹 VS 西醫> 西醫給我開的處方

2008-10-22T23:13:00.004+08:00

我睇過很多個皮膚科專科的西醫, 說起來五六個都有. 每次的收費要花成六七百蚊. 但係唔好以為西醫收得好貴. 其實我睇中醫有時收得仲貴. 之前有個中醫每次睇佢都要收成千幾蚊. 貴到真係離哂譜. 如果醫得好. 錢花多點都係值得. 但係醫唔好, 個人真係灰到震. 我之前睇中醫西醫的藥費, 無八萬都有七萬. 我真係一D都無講笑. 亦無作大. 我之前睇西醫一次$6/700. 有時一個月睇4 唔次都差唔多$3000. 睇中醫仲誇張, 睇又幾百, 晚晚煲藥, 煤氣費又幾百. 一個月就因為濕疹呢個病都用左我$3/4000. (雖然唔係個個月都要睇, 但係病左咁耐, D藥費真係唔少.)我仲要俾家用. 之前無工做真係好難過活. 好在我學歷都OK. 如果唔係都唔知點生活. 唉! 費話都係少講LA. 入番正題. 我睇左好多個皮膚科專科. D 西醫都同我講. 濕疹係無得醫. 只能控制病情.

異位性皮膚炎係常見的濕疹. 係遺傳的. (我呀爸呀媽呀妹都無人有濕疹喎! 可能係隱性掛.) D西醫成日都開我STEROID(類固醇)同抗敏藥(抗組織胺)俾我. 一開始都OK. 一搽左STEROID D 皮膚好似好番咁. 但係無幾耐又會差番. 仲要係差過之前.

STEROID 係一類壓抑免疫系統的藥，用得太多會有好多後遺症(雖然D西醫話用得恰當係無事, 但我係過來人. 有無事我最清楚!) 我之前用好少, D 皮膚就好快好番. 但其實係假象黎. 一個部份好番, 第二度有發過. 點知我越用越多. 我有試過四, 五日用一支STEROID. 如果你係濕疹病人的家長, 你可以問下你仔仔/女女, 有無覺得用STEROID用得越來越多. 好似我之前咁. 我本來一小部份皮膚有濕疹, 最後搞到成身都係. 如果真係有的話, 我叮囑你一句少用為妙.

14種主要藥材組成「一號方」

2008-10-22T22:56:00.003+08:00

14種主要藥材組成「一號方」中藥治濕疹九成見效
濕疹難以根治，病情時好時壞，令患者深受困擾。現時西醫對濕疹的治療非常有限，讓中藥有很大發揮空間，香港大學中醫藥學院最近以十四種主要藥材組成「皮疹一號方」藥方，為三十七名病人治療濕疹，結果九成二人的濕疹症狀有改善或痊愈。藥方適合大人及小童服用，但孕婦、女性行經及對中藥敏感者則要避免服用。

香港天氣炎熱潮濕，加上生活壓力大，市民容易患上濕疹，香港防癆會中醫診所暨香港大學中醫臨床研中心，就皮膚病治療總結出多條針對性藥方，其中「皮疹一號方」是針對濕疹而設。港大中醫藥學院副授沈馮君表示，一般中醫治療皮膚病時會以「龍膽瀉肝湯」為基本藥方，再配合不同病情使用不同藥材，而他嘗試起用多種藥材配合該藥方，包括具有消炎作用的地膚子、白鮮皮，利濕解毒的土茯苓，清熱燥濕的苦參等。

藥方因應不同病況增減，例如極之瘙癢者可增用蒺藜、威靈仙、烏梢蛇；大便不暢通者可增加火麻仁、生大黃；睡眠差者可加用炒棗仁、夜交藤；口渴和皮疹乾燥者則可增用玄參、麥冬等，沈馮君強調所有藥方須由中醫師處方。

三成半病人症狀全消沈馮君又在去年五月至今年三月期間，為三十七名年齡介乎二十七至七十六歲的病人使用「一號方」治療，十天為一個療程，病人平均服藥十八劑後病情有明顯改善，其中三成五病人的症狀甚至全部消退。根據臨床經驗指出，向他求診的病人逾三分一人曾經或現在患有皮膚病，以此推斷，全港有多於二百萬人受皮膚病困擾。

沈馮君又指出，服用藥方後病人的病情未必能根治，其中有三名病人在臨床治療兩個月後因飲酒復發。

除了「皮疹一號方」外，中醫藥學院亦因應不同類型的濕疹及皮膚病如小兒濕疹、蕁痲疹、粉刺及面部紅斑等，研製了共八條藥方。

<濕疹VS中醫>

2008-10-22T20:26:00.000+08:00

講到睇中醫西醫, 係呢幾廿年睇過無數個. 粗略估計都應該有睇過八, 九個中醫. 我記得細個的時候, 屋企人帶我去睇<東方紅>的中醫. 不過一直都無醫好到. 成日時好時壞. 反反覆覆. 記得係中六果年, D濕疹發到成身都係. 根本都唔想返學. 返學又無心機聽書. 成日痕到瞓唔到.

之後到我大個左, 開始出黎工作就更加煩. 我試過因為濕疹太嚴重請病假成個月. 老闆雖然都無話過要炒我. 但係做左好多暗示. 我也是一個識趣的人. 如果我係老闆, 我都會覺得好頭痛. 一個員工成日番唔到工, 成日成身都係脫皮(面都係). 點見客人呢. 最後, 我都係辭左職. 但係我一D都無怪責我的老闆. 他對我真係仁至義盡.

說番正題, 我睇左咁多個中醫. 有港大畢業的(係一個五十歲左右的中醫) 佢而家係港島東應診. 有港大hkuspace的中醫(金鐘教學中心). 廣州的一個老中醫(之前要每個星期上去一次睇佢)等等. 大致上中醫都係話我 D 皮膚有濕毒. 肝脾臟排毒功能失調等.

用過的中藥如下:
金銀花, 生地, 蒲公英, 土伏苓, 黃栢, 苦參, 子蛇, 地夫子, 馬齒莧, 甘草, 金蟬花, 蒼朮, 蟬衣, 玉米仁, 通草, 白杭菊, 防風等等.